Hesperian Health Guides
Kuran kasaaraw
Kuran ka kasaara bɛ mɔgɔ jeni walima ka mɔgɔ sɔn tigɛ.
Aw ye a tigi mabɔ kuran na, nka aw kana maga kuranjuru la o de bɛ aw yɛrɛ tanga.
- Aw ye a tigi ta ka bɔ kuran kɛrɛfɛ ani ka a mabɔ jimayɔrɔw bɛɛ la. Ni o ye a sɔrɔ kuranjuru bɛ a tigi bolo halisa, aw ye bere dɔ kɛ ka a ma bɔ a la. Aw kana maga kuranjuru fosi la, fo ni o ye a sɔrɔ kuran tɛ ka baara kɛ.
- Kuran ka cili bɛ se ka mɔgɔ ninakili jɔ. Aw ye a tigi dɛmɛ a ka ninakili.
- Ni a tigi dusukun tɛka tantan, aw ye a lajɛ ka a lasegin ni disi digidigili ye, aw bɛ aw teliya ka disi camancɛ digi kosɛbɛ (aw ye sɛbɛn ɲɛ 134 lajɛ). A bɛ se ka mɛn sen na, nka aw kana a jɔ.
- Ni a tigi bɛ ninakili ani ni a dusukun bɛ tantan, aw bɛ a fari lajɛ ni a ma jeni. i n’a fɔ marifakisɛ nɔ, u fila bɛɛ donda ni u bɔda bɛ se ka mɔgɔ jeni.
- Aw bɛ joginda wɛrɛw lahalaya ɲini. Hakiliɲagami, fasaja (farikolo lamagali gɛlɛyaw), tulogeren, walima joli ka taa ni segin gɛlɛyaw, olu bɛɛ bɛ se ka bɔ a la. Ni a tigi binna, a kunkolo bɛ se ka jogin, a kolo dɔw bɛ se ka kari, walima joli bɛ se ka bɔ a la.
Waati min kuran fanga ka dɔgɔn, ni a ye mɔgɔ ci ka a sɔrɔ a ma fiɲɛ bila a la lɛri damadɔ kɔfɛ, a bɛ se ka kɛ o tɛ basi ye. Ni kuran ye mɔgɔ ci ka a sɔrɔ a fanga ka bon walima ni sanpɛrɛn jiginna mɔgɔ kan walima ni gɛlɛya kuntaalajan dɔ bɛ a tigi la, aw ka kan ka aw janto a tigi la kosɛbɛ. Kuran mana mɔgɔ ci ni o jeninida sera wolo kɔrɔ, o dimi ka jugu ka tɛmɛ wolo sanfɛ ta kan. Farilaseginji walima fura wɛrɛw bɛ se ka mako ɲɛ. A tiɲɛninɔ dɔnni bɛ se ka se tile damadɔ walima dɔgɔkun damadɔ ma.
This page was updated: 22 Des 2024